لیژنەی پاڵپشتی رۆژنامەنووسان ئیدانەی بڕیارەكەی سەندیكای رۆژنامەنووسانی كوردستان دەكات بە لێسەندنەوەی ئەندامێتی لە رۆژنامەنووس محەمەد فاتیح نوێنەری لیژنەكە

لیژنەی پاڵپشتی رۆژنامەنووسان بە توندی ئیدانەی ئەو بڕیارە دەكات كە سەندیكای رۆژنامەنووسانی كوردستان دەریكردووە سەبارەت بە لێسەندنەوەی ئەندامێتی لە رۆژنامەنووسی هاوپیشەمان محەمەد فاتیح، كە نوێنەرایەتی لیژنەی پاڵپشتی رۆژنامەنووسان دەكات لە كوردستانی عێراق.
لێژنەكە رایدەگەیەنێت ئەو بڕیارەی سەندیكای رۆژنامەنووسانی كوردستان دەریكردووە تەعەسوفی و نادادپەروەرانەیە و پشتی بە چەند بنەمایەكی ناڕەوا بەستووە و هیچ راستی و دروستیەكی تیادا نیە، هەروەها بەشێوەیەكی روون هاودژی مافەكانی مرۆڤ و ئازادی رادەربڕینە كە لەسەر ئاستی نێودەوڵەتی و ناوخۆیی دەستەبەر كراون.
لە نووسراوی لێسەندنەوەی ئەندامێتی لە رۆژنامەنووس محەمەد فاتیح هاتووە:
" بەپشت بەستن بە مادەی 20 بڕگەی 6 لە یاسای ژمارە 4ی ساڵی 1998 ی سەندیكای رۆژنامەنووسانی كوردستان و بڕگەی 6 و 7 لە مادەی 17 ی پەیڕەوی ناوخۆی سەندیكای رۆژنامەنووسان، لەبەر ئەوەی محمد فاتیح حامد ژمارەی ناسنامەكەی 5050 بە پێچەوانەی ئامانج و رەهەندە پیشەیەكانی سەندیكا كاری كردووە و لەبەر ئەوەی ناكرێ‌ رۆژنامەنووس لە یەك كاتدا ئەندامی كارای دوو سەندیكای پیشەیی هاوشێوەی یەكتر بێت، بڕیاردرا بە سڕینەوەی لە لیستی گشتی تۆماری سەندیكای رۆژنامەنووسانی كوردستان".
جێگای باسە فاتیح لە هیچ سەندیكایەكی دیكە ئەندام نیە و ئەمە تەنها بیانوویەكە بۆ سڕینەوەی لە سەندیكای رۆژنامەنووسانی كوردستان، لەكاتێكدا سەندیكای رۆژنامەنووسانی كوردستان دڵنیایی نەداوە كە ئەندامە لە سەندیكای رۆژنامەنووسانی بەغدا یان لە شوێنێكی تر.
فاتیح ئاكراشی كرد "دوای ئەوەی چەند رێنماییەكی بڵاوكردەوە، ئازاد حەمەدەمین نەقیبی سەندیكای رۆژنامەنووسانی كوردستان لە رێگای واتسابەوە بە گاڵتە جاڕیەوە بۆیی نووسیوە: بڵاوكردنەوەی ئەم رێنماییانە كەناڵێكی دیكەیە بۆ چوونەوە بۆ بەغدا، دواتر ووشەی نەشیاوی دەرهەقم بەكارهێناوو وتی: تۆ شەرم لەخۆت ناكەیت".
لیژنەكە بە پێویستی دەزانێت و داوا دەكات رێز لە مافەكانی رۆژنامەنووسان بگیرێت و هەراسانیان نەكەن و رێگایان پێبدەن ئەركە پیشەیەكانیان بەجێبگەیەنن، بەبێ‌ دەستێوەردانی ناڕەوا و تەعەسوفی لەلایان لایانە تایبەتمەندەكانەوە، دووپاتیشی دەكاتەوە كە پێویستە كەشێكی ئازادانە و دادپەروەرانە بۆ رۆژنامەگەری لە كوردستان فەراهەم بكرێت و پێویستیشە رۆژنامەنووسان لە هەموو كاتەكاندا پارێزراوبن.
لە كۆتاییدا، لێژنەكە داوا دەكات پێداچونەوە بەم بڕیارەدا بكرێت و ئەندامێتی رۆژنامەنووس محەمەد فاتیح بگەڕێنرێتەوە بۆ سەندیكای رۆژنامەنووسانی كوردستان و لێكۆڵینەوە لە چۆنێتی دەركردنی بڕیارەكە بكرێت و لێپرسینەوە لەو كەسانە بكەن كە بەرپرسیارن لە بڕیارەكە، دووبارە داوا لە بەرپرسانی هەرێمی كوردستان دەكات كە پابەند بن بە ئازادی رۆژنامەوانی و مافەكانی رۆژنامەنووسان و دەست تێوەردان نەكەن  لە كارووباری پیشەییان و رێز لە دەستوور بگرن، كە ئازادی كاری رۆژنامەنووسی بەهەموو جۆرەكانیەوە دەستبەر كردووە.

لیژنەی پاڵپشتی رۆژنامەنووسان
12 ئاب/ ئوغستس 2023